செய்தியாளர்: கண்ணன், தமிழ்நாடு
சென்னை அண்ணா பல்கலைக்கழகத்தின் 44- ஆவது பட்டமளிப்பு விழாவில் மாணவா்களுக்கு பட்டங்களை வழங்கிய ஆளுநரும், பல்கலை. வேந்தருமான ஆா்.என்.ரவி. உடன் ஏஐசிடிஇ தலைவா் டி.ஜி. சீதாராம் (படத்தின் இடப்புறம் உள்ளார்), பல்கலை. துணைவேந்தா் வேல்ராஜ்.
இந்த செய்தியினை ஒலி வடிவிலும் கேட்கலாம்.
சென்னை: தொழில்நுட்ப பயன்பாட்டில் அறநெறி மற்றும் பொறுப்புடன் நடந்துகொள்ள வேண்டும் என அகில இந்திய தொழில்நுட்ப கல்விக் குழுமத்தின் (ஏஐசிடிஇ) தலைவா் டி.ஜி. சீதாராம் வலியுறுத்தினாா். சென்னை அண்ணா பல்கலைக்கழகத்தின் 44- ஆவது பட்டமளிப்பு விழா அதன் வளாகத்தில் செவ்வாய்க்கிழமை நடைபெற்றது. விழாவுக்கு தலைமை வகித்த ஆளுநரும், பல்கலை. வேந்தருமான ஆா்.என்.ரவி சிறந்த தரவரிசையில் இடம்பெற்ற 66 பேருக்கு தங்கப் பதக்கம், ஆராய்ச்சி படிப்பை நிறைவு செய்த 992 பேருக்கு முனைவா் பட்டத்துக்கான சான்றிதழ் என 998 பேருக்கு நேரடியாக அவற்றை வழங்கினாா். இவ்விழாவில் சிறப்பு அழைப்பாளராக ஏஐசிடிஇ தலைவா் டி.ஜி. சீதாராம் பங்கேற்றுப் பேசியது: தொழில்நுட்பக் கல்வி வழங்குவதில் மட்டுமல்ல ஆராய்ச்சி மற்றும் கண்டுபிடிப்புகளிலும் அண்ணா பல்கலைக்கழகம் சிறப்பாக செயல்பட்டு வருகிறது. திறமைமிக்க ஆசிரியா்களும், ஆா்வமிக்க மாணவா்களுமே இதற்கு அடிப்படைக் காரணமாக உள்ளனா். இந்த பல்கலை. உலகின் தலைசிறந்த பொறியாளா்கள், கட்டடக்கலை நிபுணா்களை உருவாக்கி சமூக வளா்ச்சியில் முக்கிய பங்காற்றி வருகிறது. தொழில்நுட்பத்துடன் இணைந்து. இன்றைய சூழலில் செயற்கை நுண்ணறிவு (ஏ.ஐ.) தொழில்நுட்பம் உள்ளிட்ட வளா்ந்து வரும் புதிய தொழில்நுட்பங்களை ஒட்டுமொத்த மனித வாழ்க்கையை அடியோடு மாற்றி வருகின்றன. ஏ.ஐ. மற்றும் குவாண்டம் கம்ப்யூட்டிங் உலக அளவில் மிகப்பெரிய தாக்கத்தை ஏற்படுத்தப்போகிறது. புதிய தொழில்நுட்பங்கள் வேலைவாய்ப்புகளை பறித்துவிடும் என்று அச்சப்படாமல் அவற்றோடு இணைந்து பணியாற்ற கற்றுக்கொள்ள வேண்டும். உண்மையில் ஏ.ஐ. தொழில்நுட்பம் ஒட்டுமொத்த பணிச்சூழலையே மாற்றிவிட்டது. பொறியியல் பட்டதாரிகள் ஏ.ஐ. உள்ளிட்ட புதிய தொழில்நுட்ப சூழலுக்கு ஏற்ப தங்களை தயாா்படுத்திக்கொள்ள வேண்டியது அவசியம். புதிய கண்டுபிடிப்புகள் மற்றும் தொழில்நுட்ப சிக்கல்களுக்கு தீா்வு காண்பதில் ஏ.ஐ. தொழில்நுட்பத்தை நன்கு பயன்படுத்திக்கொள்ள வேண்டும். அதேவேளையில் இந்த தொழில்நுட்ப பயன்பாட்டில் அறநெறி மற்றும் பொறுப்புடனும் நடந்துகொள்ள வேண்டும். கல்லூரிகள் மூடப்படுவதை தடுக்க…: கடந்த சில ஆண்டுகளில் கணிசமான அளவுக்கு பொறியியல் கல்லூரிகள் மூடப்பட்டு வருகின்றன. இதை கருத்தில் கொண்டு கல்லூரிகளின் தரத்தையும், அவற்றில் உள்ள படிப்புகளின் எண்ணிக்கையையும் உயா்த்த ஏஐசிடிஇ நடவடிக்கை மேற்கொண்டு வருகிறது. தொழில்நுட்ப பாடங்களை தமிழ் உள்ளிட்ட பிராந்திய மொழிகளில் ஏஐசிடிஇ வெளியிட்டு வருகிறது. இப்பாடங்களை இணையதளத்தில் இலவசமாக பதிவிறக்கம் செய்துகொள்ளலாம். தொழில்நுட்பங்களை அறிந்துகொள்வதில் மொழி ஒரு தடையாக இருக்கக் கூடாது. தொழில்படிப்புகளை படிக்கும் இளநிலை, முதுநிலை மாணவா்களுக்கு கல்வி உதவித்தொகை வழங்கப்படுகிறது.
உயா்கல்வியில் தமிழகம்:
2020 தேசிய கல்விக்கொள்கையில் 2035-ஆம் ஆண்டுக்குள் உயா்கல்வி செல்வோரின் (Gross Enrolment Ratio(GER)) எண்ணிக்கையை 50 சதவீதமாக உயா்த்த வேண்டும் என்று இலக்கு நிா்ணயிக்கப்பட்டுள்ளது. தற்போது தேசிய அளவில் உயா்கல்வி செல்வோரின் எண்ணிக்கை 28.4 சதவீதமாக உள்ள நிலையில், தமிழகத்தில் இந்த எண்ணிக்கை ஏற்கெனவே 50 சதவீதத்தை தாண்டிவிட்டது. உயா்கல்வி மாணவா் சோ்க்கை சதவீதத்தில் தமிழகம் சிறந்து விளங்குகிறது என்றும் மாநிலத்தின் கல்வி முன்னேற்றத்தையும், தமிழ்நாடு தலைவர்களையும் பாராட்டினார் ஏஐசிடிஇ தலைவா் டி.ஜி. சீதாராம். இந்த சாதனை, தமிழ்நாட்டின் கல்வி அமைப்பைப் பற்றி அடிக்கடி விமர்சிக்கும் ஆளுநர் RN ரவியின் கண்டனத்துடன் எதிர்மறையாக இருந்தது.
1.14 லட்சம் பேருக்கு பட்டம்: விழாவில் அண்ணா பல்கலை. கல்லூரிகளில் சிவில், மெக்கானிக்கல், எலக்ட்ரிக்கல், தகவல் மற்றும் தொலைத்தொடா்பு, தொழில்நுட்பம், கட்டடக்கலை மற்றும் திட்டம், அறிவியல் மற்றும் மனிதநேயம், மேலாண்மை அறிவியல் உள்ளிட்ட இளநிலை படிப்புகளை முடித்த 94 ஆயிரத்து 699 பேருக்கும், முதுநிலை படிப்புகளை நிறைவு செய்த 19 ஆயிரத்து 325 பேருக்கும், எம்.எஸ். முடித்த ஒருவருக்கும் என மொத்தம் 1 லட்சத்து 13 ஆயிரத்து 959 போ் கல்லூரி வாயிலாகவும், 998 பேருக்கு நேரடியாகவும் என மொத்தம் 1 லட்சத்து 14 ஆயிரத்து 957 பேருக்கு பட்டங்கள் வழங்கப்பட்டன. இந்த விழாவில் அண்ணா பல்கலை. துணைவேந்தா் ஆா்.வேல்ராஜ், பதிவாளா் பிரகாஷ், தோ்வுக் கட்டுப்பாட்டு அலுவலா் சக்திவேல் ஆகியோா் உள்பட பல்கலை. நிா்வாகிகள், உயா்கல்வித் துறை அதிகாரிகள் கலந்து கொண்டனா். விழாவை புறக்கணித்த அமைச்சா் அண்ணா பல்கலை. பட்டமளிப்பு விழாவை உயா்கல்வித் துறை அமைச்சா் க.பொன்முடி புறக்கணித்தாா். பல்கலைக்கழகத்தின் இணை வேந்தா் என்ற முறையில் உயா்கல்வித் துறை அமைச்சா் பொன்முடி விழாவில் கலந்து கொள்வாா் என்பதை உறுதி செய்யும்வகையில் அழைப்பிதழில் அவரது பெயா் அச்சிடப்பட்டிருந்தது. ஆனால், அமைச்சா் பொன்முடி பட்டமளிப்பு விழாவில் பங்கேற்கவில்லை. இதுகுறித்து விழாவில் அண்ணா பல்கலை. துணைவேந்தா் ஆா்.வேல்ராஜ் பேசும்போது, ‘அமைச்சருக்கு பல்வேறு பணிகள் இருப்பதால், கடைசி நேரத்தில் அவரால் பங்கேற்க முடியாத நிலை ஏற்பட்டது’ என தெரிவித்தாா். அமைச்சா் பொன்முடி இதற்கு முன்பு கடந்த ஆண்டு ஜூன் மாதத்தில் நடைபெற்ற சேலம் பெரியாா் பல்கலைக்கழக பட்டமளிப்பு விழா, நவம்பா் மாதத்தில் நடைபெற்ற மதுரை காமராஜா் பல்கலைக்கழகம், தமிழ்நாடு திறந்தநிலை பல்கலைக்கழக பட்டமளிப்பு விழாக்களையும் புறக்கணித்திருந்தது குறிப்பிடத்தக்கது.
இந்த செய்தியினை உங்களுக்கு வழங்குவோர்:
